Мацвіенка прапанавала напоўніць Саюзную дамову Беларусі і Расіі новым зместам
Пра гэта яна заявіла на сустрэчы са старшынёй Савета Рэспублікі Міхаілам Мясніковічам.
Саюзную дамову Беларусі і Расіі трэба напоўніць новым зместам, адпаведным выклікам і новым магчымасцям сённяшняга дня. Пра гэта спікер расійскага Савета Федэрацыі Валянціна Мацвіенка заявіла ў сераду на сустрэчы са старшынёй беларускага Савета Рэспублікі Міхаілам Мясніковічам, паведамляе РІА "Новости".
Па словах Мацвіенка, калі паміж краінамі і ўзнікаюць нейкія праблемы, дык яны вырашаюцца "ў рабочым парадку, у нас няма невырашальных пытанняў".
У сваю чаргу Мясніковіч падкрэсліў важнасць міжпарламенцкай супрацы паміж дзяржавамі, а таксама "пытанні гарманізацыі заканадаўства, каб своечасова здымаць магчымыя існуючыя бар'еры".
Нагадаем, што сёння праходзіць нефармальная сустрэча Аляксандра Лукашэнкі і Уладзіміра Пуціна ў Валаамскім манастыры. Мяркуецца, што адной з тэмаў іх сустрэчы будзе менавіта інтэграцыя і лёс Саюзнай дзяржавы.