“Любую краму можна зачыніць. Гэта я вам як былы эканаміст кажу”
Еўрарадыё даведалася, што абмяркоўваюць людзі на стыхійных сходах, каля зачыненых Мінгандлем крам.
Не паспела Міністэрства гандлю атрымаць дазвол на закрыццё крам за выяўленыя парушэнні, як адразу пачало карыстацца новымі паўнамоцтвамі. За тыдзень працы кантралёраў, а іх па ўсёй краіне толькі 34 чалавекі, за розныя парушэнні, у тым ліку, пратэрмінаваныя прадукты і недастатковую колькасць беларускіх тавараў, былі часова зачыненыя 3 крамы “Гиппо”, адзін “Еўраопт”, а таксама 7 крамаў “Электрасіла” і “5 элемент”.
“Па “Гиппо” на 7 дзён прыпыненая дзейнасць. Але яны маюць права выправіць недахопы раней і звярнуцца ў міністэрства. Тады мы правяраем і даём дазвол на адкрыццё”, — тлумачаць схему ў міністэрстве гандлю.
А што думаюць людзі пра закрыццё крам?
Каля зачыненага “Гиппо” на сталічнай вуліцы Жукоўскага апоўдні ўжо некалькі чалавек. Спрабуюць па звычцы зайсці і нешта купіць. На дзвярах абвестка: “Крама зачыненая. Просім прабачэння за нязручнасці”.
“Не заўважала, каб быў тут пратэрмінаваны тавар. Ды тут яшчэ ёсць “Еўраопт” і “Віталюр”. Я заўжды правярала тэрмін прыдатнасці, усё нармальна было”, — кажа пра зачынены маркет маладая мама Вераніка.
Кожную хвіліну ў краму спрабуе нехта зайсці. Каб упэўніцца, што абвестка пра закрыццё не хлусіць, спрабуюць штурхаць дзверы.
“Тут бывае нешта на зніжках, добрае малако бывае, тварог. Таму сюды прыходжу. Добрыя сухафрукты тут. А так, у іншыя крамы можна хадзіць”, — не асабліва пераймаецца Анна Валер’еўна — пенсіянерка, якая не ведала, што краму зачынілі.
Яўгенія раней хадзіла ў зачыненую краму штодня, цяпер давядзецца мяняць звычкі. Яны прыгадвае, што садавіна была не вельмі.
“Бывала праблема з садавіной, бывалі гнілаватыя. А малочныя прадукты мяне задавальнялі. Але ёсць куды схадзіць усё адно. Праўда, па коштах тут было танней”.
Праз паўгадзіны ля крамы збіраюцца некалькі пенсіянерак і адзін пенсіянер, якія прыходзіць падзяліцца навінамі. Распавядаюць, хто і навошта яе зачыніў. Пасля пачынаецца абмеркаванне: ці мелі рацыю кантралёры з Мінгандлю.
“Любую краму можна зачыніць, знайсці там парушэнні. Гэта я вам як былы эканаміст кажу”, — даводзіць астатнім адна з пенсіянерак.
Ля зачыненага чыноўнікамі мінскага “Еўраопта” ва Уруччы па вуліцы Нікіфарава вісіць абвестка: “Крама зачыненая па тэхнічных прычынах”. Наведвальнікаў амаль няма, за 15 хвілін зайсці па прадукты спрабуюць толькі дзве пенсіянеркі.
“Парушэнняў у гэтай краме, тым больш пратэрмінаванай прадукцыі, не прыгадваю, але ж не проста так зачынілі, штосьці знайшлі ж”, — пагаджаецца Іна Валер’еўна. І накіроўваецца ва ўніверсам “Першамайскі”, праз дарогу.
Зачынены "Гиппо" на Жукоўскага
Зачыненая крама "Еўраопт"
Фота: Еўрарадыё