Лукашэнку заклікаюць паважаць тэрытарыяльную цэласнасць Грузіі
У Тбілісі абураныя візітам у РБ кіраўніка непрызнанай Абхазіі / mfa.gov.ge
МЗС Грузіі асудзіў сустрэчу ў Мінску Аляксандра Лукашэнкі з кіраўніком непрызнанай Абхазіі Асланам Бжанія.
"Гэтая акцыя груба парушае суверэнітэт і тэрытарыяльную цэласнасць Грузіі ў міжнародна прызнаных межах і з'яўляецца спробай узаконіць расійскі акупацыйны рэжым, — гаворыцца ў заяве. — Заклікаем Беларусь паважаць суверэнітэт і тэрытарыяльную цэласнасць Грузіі ў міжнародна прызнаных межах, спыніць прадпрымаць такія дзеянні, якія супярэчаць асноватворным прынцыпам і нормам міжнароднага права".
Падчас сустрэчы з Бжанія Лукашэнка крытыкаваў улады Грузіі, у тым ліку — за сітуацыю з экс-прэзідэнтам Міхаілам Саакашвілі. Сам Аляксандр Лукашэнка летась наведаў горад Піцунду ў Абхазіі. Улады Грузіі адрэагавалі на гэта пратэстам.
Абхазія — самаабвешчаная непрызнаная дзяржава на тэрыторыі Грузіі, якая існуе з 2008 года, з часу расійска-грузінскай вайны.
