Відаць, гэта адгалосак выказвання Лукашэнкі падчас сустрэчы з дзейным і былымі міністрамі замежных спраў 18 студзеня. Ён згадаў пра інфармацыйныя атакі з Расіі на Беларусь, наконт якіх ён збіраўся пагаварыць з кіраўніцтвам Расіі. Лукашэнка планаваў на іх адказваць з дапамогай інтэрнэту.
"Прапагандаваць нам асабліва не трэба, — гаварыў у чацвер на нарадзе Аляксандр Лукашэнка. — А весці барацьбу за свае прынцыпы, падымаць імідж нашай краіны — гэта трэба. І супрацьстаяць, асабліва ў СМІ, тым атакам, якія прадпрымаюцца на Беларусь (а яны часам з розных бакоў робяцца), мы павінны ўмець".
Паводле слоў Лукашэнкі, эфектыўнасць "беларускіх контратак" пакуль слабая, "асабліва ў проціборстве з рознага роду каналамі, старонкамі і сайтамі ў інтэрнэце". І пры гэтым у Беларусі для гэтага хапае спецыялістаў-прафесіяналаў. "Проста не было адпаведнай арганізацыі. Гэта трэба ўмець зрабіць", — адзначыў кіраўнік дзяржавы. А цяпер, кажа ён, наспела пытанне для стварэння арганізацыі, якая будзе ацэньваць рэйтынгі СМІ. І ёй павінны давяраць і сродкі масавай інфармацыі, і звычайныя людзі.
Пытанне інфармацыйнай бяспекі будзе таксама абмяркоўвацца на Савеце бяспекі Беларусі.
