Лукашэнка выказаўся пра фільм DW пра беларускія "эскадроны смерці"

Лукашэнка выказаўся пра фільм DW пра беларускія "эскадроны смерці"

Аляксандр Лукашэнка выказаўся пра нядаўні фільм DW пра беларускія "эскадроны смерці". Яго героем быў былы беларускі спецназавец Юрый Гараўскі, які сцвярджае, што ў 1999-м быў удзельнікам "эскадрона смерці", удзельнічаў у выкраданнях і забойствах апазіцыянераў Юрыя Захаранкі, Віктара Ганчара, бізнесмена Анатоля Красоўскага.

24 снежня ў інтэрв'ю галоўнаму рэдактару радыёстанцыі "Эхо Москвы" Аляксею Венедыктаву Лукашэнка назваў фільм "правакацыяй". "Навошта гэта трэба? Заўтра прэзідэнцкія выбары", — так патлумачыў кіраўнік дзяржавы яго з'яўленне.

Лукашэнка: "Ніхто зверху акрамя прэзідэнта не можа даць такую каманду [пра выкраданне і забойства палітычных апанентаў]... Ніхто... У Беларусі, калі я не дам каманду, ніхто не будзе здзяйсняць гэтыя злачынствы. Я ніколі ў жыцці не даваў і даваць не буду такой каманды. Навошта мне гэта трэба было? Што змянілася, калі не стала ў Беларусі 2-3 чалавекі?!".

Лукашэнка згадаў зніклага летам 2000-га аператара Дзмітрыя Завадскага. Па яго словах, ён "загінуў з-за Чачні і [Паўла] Шарамета". Відаць, Аляксандр Лукашэнка мае на ўвазе, што Шарамет зрабіў сюжэт на тэму Чачні і затрыманага там расіянамі беларускага спецназаўца. А Завадскі працаваў з Шараметам, і яго маглі скрасці, каб адпомсціць ці даведацца нейкую інфармацыю.

"Не трэба на мяне гэта "грузіць". Я не даю такіх каманд!", — у чарговы раз заявіў Лукашэнка.

Згадваючы Захаранку і Ганчара, Лукашэнка сказаў: "Якімі яны палітыкамі былі?!". Ён назваў Ганчара сваім "таварышам і сябрам", з якім яны разам хадзілі ў лазню і былі ў парламенце. Красоўскага ён не ведаў. Выказаўся Аляксандр Лукашэнка пра Юрыя Захаранку: "Захаранка звязаўся ў бізнесе з Украінай. Пра гэта вы не пішаце. Грошы ўзяў вялізныя... не вярнуў...".

Кіраўнік Беларусі заявіў, што ў Германіі нібыта кагосьці з дваіх зніклых бачылі "гадоў 8 таму", "зрабілі фота на вуліцы" і яно з'явілася ў нейкім нямецкім выданні. З Беларусі зрабілі запыт у Германію, але адказу не атрымалі. Нешта падобнае ён ужо заяўляў раней.

Пасля з'яўлення фільма DW Лукашэнка загадаў Следчаму камітэту неадкладна заняцца справай. "Хай прыедзе, дасць паказанні: хто яго заб'е?!", — кажа кіраўнік дзяржавы пра Юрыя Гараўскага. Ён згодны нават, каб былы спецназавец прыехаў пад аховай прадстаўнікоў замежных спецслужбаў. Але Аляксандр Лукашэнка падкрэслівае, што ён пакуль не едзе: "Цішыня!". Калі з Германіі не будзе адказу ў яго справе, Гараўскага аб'явяць у вышук.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі