Лукашэнка не выключае, што будзе беларуская вакцына ад каранавіруса

Аляксандр Лукашэнка не выключае, што будзе беларуская вакцына ад каранавіруса. Пра гэта ён заявіў 14 снежня падчас наведвання 4-й гарадской клінічнай бальніцы Мінска.

"Калі напрацоўкі нашых навукоўцаў акажуцца сур'ёзнымі, будзем займацца вытворчасцю ўласнай вакцыны", — цытуе словы Лукашэнкі тэлеграм-канал @ontnews.

А пакуль, па яго словах, разглядаецца магчымасць вытворчасці расійскай вакцыны, а таксама яе закупка для вакцынацыі "груп рызыкі".

Планы амбіцыйныя, паколькі вакцыну распрацавалі толькі сапраўдныя гіганты фарміндустрыі, патраціўшы на гэта мільёны (калі не мільярды) долараў.

Раней віцэ-прэм'ер беларускага ўрада Ігар Петрышэнка заявіў, што Беларусь плануе закупіць вакцыну ад COVID-19 для 2 мільёнаў грамадзян. Лукашэнка даручыў прапрацаваць магчымасць арганізацыі ў нашай краіне ўласнай вытворчасці расійскай вакцыны Sputnik-V у пачатку лістапада.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.