Лідары G7 заклікаюць улады Беларусі не садзейнічаць расійскай агрэсіі
![Захад паслаў яшчэ адзін сігнал Аляксандру Лукашэнку / kommersant.ru](/sites/default/files/styles/gallery_main/public/2023-08/KMO_174661_00248_1_t222_223628.jpg.webp?itok=1T_JQ6p8)
Захад паслаў яшчэ адзін сігнал Аляксандру Лукашэнку / kommersant.ru
Лідары G7 заклікаюць улады Беларусі не садзейнічаць расійскай агрэсіі. Пра гэта гаворыцца ў выніковай заяве па выніках відэаканферэнцыі кіраўнікоў краін "Вялікай сямёркі", якая прайшла ў аўторак.
"Мы паўтараем свой заклік беларускім уладам спыніць садзейнічанне расійскай вайсковай агрэсіі, дазваляючы расійскім узброеным сілам выкарыстоўваць беларускую тэрыторыю і аказваючы падтрымку расійскім вайскоўцам, — гаворыцца ў заяве. — Абвяшчэнне пра супольную вайсковую групоўку з Расіяй з'яўляецца апошнім прыкладам дапамогі Расіі з боку беларускага рэжыму. Мы зноў заклікаем рэжым Лукашэнкі поўнасцю выконваць свае абавязацельствы па міжнародным праве".
У G7 уваходзяць Вялікабрытанія, Германія, Італія, Францыя, ЗША, Канада і Японія. У самітах аб'яднання ўдзельнічаюць і прадстаўнікі Еўрасаюза. Украінскі прэзідэнт Уладзімір Зяленскі ў сваім выступе на анлайн-саміце лідараў G7 прапанаваў размясціць на мяжы Украіны з Беларуссю місію міжнародных наглядальнікаў для маніторынгу сітуацыі з бяспекай.
G7 запэўніла Украіну ў поўнай яе падтрымцы. Расію папярэдзілі, што прымяненне любой зброі масавага паражэння пацягне для яе "вельмі сур'ёзныя наступствы". Была асуджана "ядзерная" рыторыка кіраўніцтва РФ, расійскія ўдары па грамадзянскай інфраструктуры Украіны.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.