Латушка растлумачыў, пры якіх умовах санкцыі будуць мець плён
![Латушка растлумачыў, пры якіх умовах санкцыі будуць мець плён](/sites/default/files/styles/gallery_main/public/2023-08/img_20200819_115923_0.jpg.webp?itok=gXyILmXc)
Кіраўнік Народнага антыкрызіснага ўпраўлення (НАУ) Павел Латушка выказаўся ў эфіры Еўрарадыё пра эфектыўнасць санкцый, якія ўводзяцца краінамі Захаду. Адказаў ён і на сумневы шэрагу палітолагаў у эфектыўнасці санкцый.
— Па-першае, хочацца запытацца ў шаноўных палітолагаў: якія іншыя ў нас ёсць інструменты, калі ў краіне гвалт, калі грамадзяне не маюць права на абарону правоў, калі адвакатаў пазбаўляюць ліцэнзій?.. Асоба ніяк не можа абараніць сябе перад беларускімі ўладамі. Які інструментарый ёсць?
Санкцыі ж — рэальны інструмент знешняга ціску. Таксама гэта “тэст і для Еўрапейскага саюза”.
— Санкцыі накіраваныя не на тое, каб пакараць улады, а каб прымусіць улады змяніць стаўленне да народа, паводзіны. І яны будуць эфектыўнымі, толькі калі будуць рэальнымі, — дадае Павел Латушка. — Санкцыі не будуць мець выніку, калі іх не будзе. А сёння іх няма.
На цяперашні момант Еўрасаюз увёў тры пакеты санкцый супраць беларускіх афіцыйных асоб, адказных за фальсіфікацыю выбараў і гвалт, а таксама супраць бізнесменаў, якіх падазраюць у фінансавым забеспячэнні рэжыму Лукашэнкі. Да абмежаванняў далучыліся многія краіны па-за межамі ЕС. Латушка ўпэўнены, што чацвёрты пакет санкцый будзе прыняты неўзабаве.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.