Колькасць ухілістаў ад войска на Магілёўшчыне за год вырасла ўдвая
Сёлета ў Магілёўскай вобласці да крымінальнай адказнасці за ўхіленне ад службы ў войску прыцягнулі 58 чалавек. Пра гэта паведамляе тэлерадыёкампанія “Магілёў” са спасылкай на мясцовую пракуратуру.
У ведамстве мяркуюць, што дзяржаўныя органы недапрацоўваюць у тлумачэнні прызыўнікам вайсковага заканадаўства, іх правоў і абавязкаў, а таксама адказнасці за адхіленне службы ў войску.
Калі ўхіліста знаходзяць да заканчэння тэрмінаў прызыву, то яго прыцягваюць да адміністрацыйнай адказнасці. Калі ж яго не знаходзяць за гэты час, то прыцягваюць да крымінальнай адказнасці. Замест службы ў войску прызыўнік можа быць пазбаўлены свабоды тэрмін да двух гадоў.
Дарэчы, летась на Магілёўшчыне было зафіксавана 30 выпадкаў ухілення ад вайсковай службы. Сёлета прызыў працягнуты да 30 лістапада.
