Кандыдат у дэпутаты спрабавала перадаць праз экран "жудасны пах хлоркі"
![Кандыдат у дэпутаты спрабавала перадаць праз экран "жудасны пах хлоркі"](/sites/default/files/styles/gallery_main/public/2023-08/kavalkova.png.webp?itok=z_hvHmB7)
Кандыдат у дэпутаты Палаты прадстаўнікоў, хрысціянская дэмакратка Вольга Кавалькова выступіла на дзяржаўным тэлеканале "Беларусь 3" з запамінальнай прамовай. Яна балатуецца ў Мінску па Пушкінскай выбарчай акрузе № 103. Кавалькова арыгінальна сябе прадставіла:
"Я, Вольга Кавалькова, апазіцыянерка, сапраўдная прадстаўніца той самай "пятай калоны", якой так баяцца ўлады і пужаюць людзей, як бабайкай... Я — адукаваная, разумная, маладая і сімпатычная, і ўяўляю пагрозу толькі для ўлады".
Па словах Кавальковай, яна ўдзельнічае ў выбарах для таго, каб паказаць існаванне ў Беларусі альтэрнатывы. Кандыдат акрэсліла асноўныя праблемы, якія на сённяшні дзень існуюць у нашай краіне, ды агучыла варыянты іх вырашэння. Вольга Кавалькова неаднаразова падкрэсліла, што Беларусь мусіць заставацца незалежнай дзяржавай.
"Ці можаце вы заўтра прачнуцца грамадзянамі іншай, варожай краіны? Я — не! — гаварыла кандыдат у дэпутаты. — Бо Расія — гэта тупік, і хай яна з гэтага тупіка выходзіць без нас".
Безумоўна запомняцца гледачам словы Кавальковай пра якасць вады ў Фрунзенскім раёне Мінска. "Я так хачу зараз піць...", — сказала хрысціянская дэмакратка і дастала бутэльку з вадой, набраную там.
"Вы адчуеце жудасны пах хлоркі нават праз экран", — папярэдзіла Вольга Кавалькова, адкрываючы бутэльку.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.