Камітэт ААН па правах чалавека патрабуе "тэрміновыя меры абароны" Ціханоўскага
![Сяргей Ціханоўскі / Еўрарадыё](/sites/default/files/styles/gallery_main/public/2023-08/ciha_0.jpg.webp?itok=oiEpmVt-)
Сяргей Ціханоўскі / Еўрарадыё
Камітэт па правах чалавека (КПЧ) ААН звярнуўся да афіцыйнага Мінска ў справе палітвязня Сяргея Ціханоўскага, якую цяпер разглядае КПЧ. ААН патрабуе забяспечыць фізічнае і псіхічнае здароўе Ціханоўскага, доступ яго да кваліфікаванай медыцынскай дапамогі, адвакатаў і сям'і. Пра гэта паведамляе прэс-служба Святланы Ціханоўскай.
"Утрыманне пад вартай без сувязі са знешнім светам, якое стварае рызыку гвалтоўнага знікнення, сведчыць пра стратэгію пакарання палітычных апанентаў і ўтойвання доказаў жорсткага абыходжання і катаванняў, якія яны зазнавалі з боку супрацоўнікаў праваахоўных органаў і турэмнай адміністрацыі", — гаворыцца ў дакуменце, які цытуе прэс-служба.
Сяргей Ціханоўскі, як і іншыя знакавыя палітвязні, ужо год не мае сувязі са знешнім светам. Ён асуджаны на 19,5 года пазбаўлення волі.
Камітэт ААН па правах чалавека патрабуе прыняць тэрміновыя меры абароны таксама ў дачыненні да адваката Максіма Знака і палітыка Віктара Бабарыкі, якія засталіся без сувязі са знешнім светам.
Як распавядала Еўрарадыё, сваякі палітвязня Мікалая Статкевіча, ад якога няма звестак таксама год, арганізавалі акцыю "Пакажыце Статкевіча!".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.