"Камерсант": пасля эканамічнай Беларусь чакае палітычная інтэграцыя з Расіяй

У праекце па паглыбленні эканамічнай інтэграцыі ўсяго 31 "дарожная карта". Па інфармацыі "Камерсанта" ўрады Расіі і Беларусі ўжо ўзгаднілі 16 з іх. Якія канкрэтна напрамкі адпрацаваны газета не ўдакладняе.

Плануецца, што па большасці пытанняў, што засталіся нявырашанымі, працу завершаць да 19 лістапада, да сустрэчы прэм'ер-міністраў Румаса і Мядзведзева ў рамках пасяджэння Савета міністраў Саюзнай дзяржавы.

Пры гэтым "Камерсант" удакладняе, што непасрэдна на пасяджэнні Савета міністраў абмяркуюць "сем-восем" яшчэ няўзгодненых "дарожных карт", адкладзеных для абмеркавання на прэм'ерскім узроўні. У прыватнасці газета удакладняе, што сярод нявырашаных пытанняў: сельская гаспадарка і энергетыка.

Яшчэ адно з галоўных праблемных пытанняў — падатковае заканадаўства. Праграма эканамічнай інтэграцыі прадугледжвае, што да 1 красавіка 2021 года ў Саюзнай дзяржаве будзе адзіны падатковы кодэкс. Улічваючы розніцу падатковага заканадаўства паміж дзвюма краінамі — гэта стала сур'ёзнай праблемай у перамовах.

Адна з крыніц "Камерсанта" заяўляе, што акрамя паглыблення эканамічнай інтэграцыі, у Саюзнай дзяржаве павінны быць створаныя наднацыянальныя органы, якіх няма:

"Адносна іх, як і па агульнай канстытуцыі, дамовіцца пакуль не ўдаецца", — перадае "Коммерсант". — "Аб палітычнай інтэграцыі ў рамках Саюзнай дзяржавы можна будзе казаць толькі пасля таго, як запрацуе ўсё, што запісана ў эканамічных "дарожных мапах". А пасля гэтага рухацца ў палітычную бок".