Дапамагаць даглядаць за дзіцем сям'і інвалідаў з Івацэвічаў будзе няня

Івацэвіцкі райвыканкам вырашыў вылучыць стаўку няні для сям'і інвалідаў, каб дапамагаць ім даглядаць за дзіцем.

Начальнік упраўлення па працы, занятасцi i сацыяльнай абароне насельніцтва Івацэвіцкага райвыканкама Нона Калеснікава паведаміла агенцтву БелаПАН, што гэта будуць два сацыяльныя работнікі на паўстаўкі кожны. "Штодня, у тым ліку ў выходныя дні, няня будзе дапамагаць сям'і ў сярэднім па пяць з паловай гадзін", — паведаміла Калеснікава.

Пасля зацвярджэння кандыдатур на пасаду няні Ганну Бахур з сынам выпішуць з Івацэвіцкай раённай лякарні, дзе яны зараз знаходзяцца. Аплачвацца праца няні будзе са сродкаў мясцовага бюджэту.

Як паведамляла Еўрарадыё, Ганна і Анатоль Бахур, жонка і муж, маюць першую групу інваліднасці. У жанчыны — прыроджаная анамалія канечнасцяў, у мужа — ДЦП. 21 ліпеня ў іх нарадзілася першае дзіця. І хаця дзіця нарадзілася здаровым, хлопчыка хацелі забраць у бацькоў, бо паводле медыцынскіх нормаў яны не могуць выконваць бацькоўскія абавязкі.

Сітуацыю ўдалося пераламіць пасля ўмяшання міністра працы і сацыяльнай абароны Марыяны Шчоткінай, якая прыехала ў Івацэвічы вывучыць праблему.

Міністр працы  — пра сітуацыю з бацькамі-інвалідамі, у якіх забіраюць дзіця

Сям'і інвалідаў з Івацэвічаў дазволілі гадаваць дзіця

Ці могуць у краінах ЕС адабраць дзіця ў бацькоў-інвалідаў, як у Беларусі?

Фота: БЕЛТА