Да 10 гадоў турмы можа пагражаць іранкам, якія выйдуць на вуліцу без хіджабу

Парламент Ірана прыняў законапраект, які прадугледжвае 10 гадоў турмы для жанчын, якія парушаюць правілы ісламскага дрэс-кода. Законапраект называецца "Аб хіджабе і цнатлівасці". За яго прагаласавалі 152 дэпутата, супраць выступілі 34, устрымаліся — 7, піша ВВС.

Пасля пратэстаў, якія здарыліся ў Іране год таму, многія жанчыны адмаўляюцца пакрываць галаву. Цяпер па законе іх могуць пакараць штрафам, яны могуць быць затрыманыя для гутаркі. Але ў паліцэйскім участку яны могуць сутыкнуцца са здзекамі. Адна з дзяўчат распавядала журналістам, што яе, да прыкладу, адправілі ў морг мыць трупы. Акрамя таго, суд можа прызначыць жанчыне без хіджаб спецыяльную "тэрапію". Але жанчыны ў Іране працягваюць адстойваць свае правы.

Новы законапраект яшчэ павінен ухваліць Савет вартавых — орган канстытуцыйнага нагляду, пасля чаго ён стане паўнавартасным законам.

Нагадаем, хвалю пратэстаў супраць ушчамлення правоў жанчын справакавала смерць маладой іранкі Махсы Аміні ў верасні мінулага года. Яе затрымалі на вуліцы за хустку, якая з'ехала на патыліцу. У паліцэйскім участку яе збілі, у бальніцу прывезлі ўжо ў стане комы. Дзяўчына памерла. Ёй было 22 гады. На пахаванні Махсы жыхаркі яе роднага горада зрывалі з сябе хіджаб і паранджы. Настроі перакінуліся ў Тэгеран, а далей — па ўсёй краіне. Падтрымалі іх і мужчыны. Праз некалькі месяцаў пратэсты былі падушаныя, але настроі ў грамадстве не змяніліся.