Часопіс Playboy закрывае друкаваную версію ў ЗША
Славуты часопіс Playboy да канца 2020 года перастане выходзіць у друкаванай версіі. Праўда, пакуль толькі ў ЗША. Пра гэта заявіла сама рэдакцыя выдання ў сваім адкрытым лісце.
Уладальнікі часопіса прызнаюць, што на рашэнне ўскосна паўплывала эпідэмія каранавіруса: яна замарудзіла вытворчасць і сарвала тэрміны паставак.
Аднак галоўнай прычынай рашэння называецца падзенне цікавасці да друкаванай версіі часопіса.
Апошнім друкаваным нумарам у ЗША стане выпуск "Вясна 2020". Пасля гэтага выданне стане цалкам анлайнавым.
Часопіс Playboy вядзе сваю гісторыю ад 1953 года. Найбольшай папулярнасці ён дасягнуў на пачатку 1970-х: тады наклад выдання складаў больш за 5,5 мільёна асобнікаў у месяц.
На падзенне накладаў моцна паўплывала развіццё інтэрнэту. З мінулага года часопіс перайшоў на квартальныя выпускі замест штомесячных.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.