Чарнагорскі самалёт праляцеў у Літву праз тэрыторыю Беларусі
Чарнагорскі самалёт прыляцеў у Літву праз Беларусь / flightradar24.com
12 чэрвеня ў Літву праз паветраную прастору Беларусі прыбыў самалёт чарнагорскай авіякампаніі, заўважыў тг-канал @motolkohelp.
Борт авіякампаніі Air Montenegro з нумарам 4O-AOA (самалёт Embraer E195LR) ляцеў па маршруце Ціват-Вільня і прызямліўся ў сталіцы Літвы а 10-й гадзіне.
Літоўскія ўлады яшчэ ў 2021 годзе забаранілі авіякампаніям вылеты і прылёты праз паветраную прастору Беларусі. Адбылося гэта пасля таго, як беларускія ўлады прымусова пасадзілі самалёт кампаніі Ryanair, з борта якога знялі экс-галоўрэда Nexta Рамана Пратасевіча і адміністратарку ЧКБ Сафію Сапега.
Рэйс Ціват-Вільня з'яўляецца чартарным. Ён з'явіўся толькі напрыканцы траўня. На сёння адбылося толькі пяць рэйсаў па гэтым маршруце. Толькі адзін з гэтых рэйсаў прайшоў праз паветраную прастору Беларусі. Паводле папярэдняй інфармацыі, скарачэнне шляху не тлумачыцца ні дрэннымі ўмовамі надвор'я, ні нейкімі форс-мажорнымі абставінамі.
