Беларускія памежнікі абвінавацілі ўкраінцаў у правакацыі
Нібыта тут заснята правакацыя ўкраінцаў на беларускай мяжы / скрыншот
Дзяржпагранкамітэт Беларусі абвінавачвае ўкраінскіх вайскоўцаў у правакацыі на мяжы з Беларуссю. Нібыта 19 лістапада каля 16:00 на чыгуначным пункце пропуску "Славечна" (з украінскага боку гэта "Выступовічы") узброены чалавек незаконна перасёк мяжу і зайшоў на тэрыторыю Беларусі.
Мяжа ў гэтым месцы праходзіць па цэнтры чыгуначнага моста. "Знаходзячыся на беларускай тэрыторыі, украінскі вайсковец ажыццяўляў фота- і відэаздымку мясцовасці, а таксама шукаў ці ўсталёўваў нешта ў снезе", — паведамляе ДПК РБ. Ведамства пачало праверку.
Між тым, відэа, паказанае беларускімі памежнікамі ў якасці "доказу", не змяшчае моманту пераходу "украінцам" мяжы. Таксама яно не дазваляе ідэнтыфікаваць знятага чалавека не толькі як грамадзяніна Украіны, але і як вайскоўца.
