Беларускіх фехтавальшчыкаў дапусцілі да міжнародных спаборніцтваў
![Абмежаванні ў фехтаванні здымаюць / Ілюстрацыйнае фота vk.com](/sites/default/files/styles/gallery_main/public/2023-08/R33.jpg.webp?itok=RDT52Wyp)
Абмежаванні ў фехтаванні здымаюць / Ілюстрацыйнае фота vk.com
Беларускіх і расійскіх фехтавальшчыкаў дапусцілі да міжнародных спаборніцтваў. Абмежаванні з іх здымуць у канцы красавіка. Такое рашэнне прыняў пазачарговы кангрэс Міжнароднай федэрацыі фехтавання. Праўда, меркаванні на ім падзяліліся: "за" прагаласавалі 89 дэлегатаў, "супраць" — 46. Украінскія прадстаўнікі спрабавалі заблакаваць галасаванне. Федэрацыя фехтавання Украіны збіраецца абскардзіць рашэнне.
У выніку беларускія і расійскія спартсмены змогуць паўдзельнічаць у чэмпіянаце свету ў Мілане ў ліпені 2023-га, але выключна пад нейтральным сцягам. Таксама яны паўдзельнічаюць у кваліфікацыі да Алімпійскіх гульняў 2024 года ў Парыжы.
Спартсмены з Беларусі і Расіі былі адхілены ад міжнародных спаборніцтваў пасля пачатку расійскай агрэсіі супраць Украіны. Сёлета Міжнародны Алімпійскі камітэт заклікаў спартыўныя федэрацыі дапусціць спартсменаў з РБ і РФ да спаборніцтваў пад нейтральным сцягам. Гэта выклікала абурэнне ў свеце — больш за тры дзясяткі краін вырашылі сумесна гэтаму супрацьстаяць. Украіна пагражае байкотам Алімпіяды.
У пачатку лютага прэзідэнт Украіны Уладзімір Зяленскі эмацыйна запрасіў прэзідэнта МАК Томаса Баха (былога фехтавальшчыка, дарэчы) прыехаць ў Бахмут, дзе ідуць цяжкія баі. Ехаць туды ён пакуль не плануе.
![Беларускіх фехтавальшчыкаў дапусцілі да міжнародных спаборніцтваў](/sites/default/files/styles/default_image_paragraph/public/paragraphs/image/29074446332140352655087297775083049322316975n_1.jpg.webp?itok=88MzN2Bv)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.