Беларуска Лілія Яноўская ўзняла беларускі сцяг на Эверэст
![Нацыянальны беларускі сцяг на Эверэсце / facebook.com/liliya.ianovskaia](/sites/default/files/styles/gallery_main/public/2023-08/flag_16_05.jpg.webp?itok=c_vSha9T)
Нацыянальны беларускі сцяг на Эверэсце / facebook.com/liliya.ianovskaia
Беларуска Лілія Яноўская падняла беларускі сцяг на Эверэст. Разам з дачкой Дар'яй у складзе каманды альпіністаў яна паднялася на самую высокую вяршыню свету 14 мая.
"Мы неслі беларускі нацыянальны, украінскі і канадскі сцягі ўсю дарогу", — напісала яна пазней у сацсетках. Гэтыя сцягі яны і разгарнулі на вяршыні. Паводле слоў Ліліі, яна верыць "у любоў, спачуванне і разуменне паміж людзьмі ў гэтым свеце. Любоў, праўда і свабода перамогуць".
Гэта ўжо не першая спроба беларускі скарыць Эверэст. Год таму яна была гатовая падняцца на вяршыню, але захварэла на каранавірус.
"Мне шкада, што БЧБ-сцяг так і не быў узняты сёлета над Эверэстам. Але вяршыня нікуды не дзенецца. Гэта абавязкова адбудзецца", — гаварыла яна тады. Еўрарадыё расказвала яе драматычную гісторыю.
Лілія Яноўская нарадзілася ў Івянцы, жыла ў Мінску. У 1990-я сям'я Яноўскай эмігравала ў Канаду. У яе два пашпарты, канадскі і беларускі. Пасля нараджэння трэцяй унучкі Лілія захапілася альпінізмам — ёй тады было 50. Сярод заваяваных вяршыняў — Аканкагуа (6962 м, найвышэйшы пік у Паўднёвай Амерыцы), гара Матэрхорн ў Швейцарыі (4478 м), Рэйнір ў ЗША, стратавулканы ў Перу, Мексіцы і Эквадоры.
![Белоруска Лилия Яновская подняла белорусский флаг на Эверест](/sites/default/files/paragraphs/image/flag16052.jpg)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.