БАТЭ згуляе са славацкім “Слованам” у плэй-оф Лігі чэмпіёнаў

У плэй-оф Лігі чэмпіёнаў барысаўскі БАТЭ згуляе з браціслаўскім “Слованам”. Лёсаванне галоўнага еўрапейскага клубнага турніру адбылося 8 жніўня ў Ньёне. Беларускі клуб быў у кошыку сярод сеяных каманд. Гэта азначае, што сапернікамі барысаўчан маглі стаць клубы, якія лічацца слабейшымі.

Нагадаем, у другім кваліфікацыйным раўндзе БАТЭ прайшоў албанскі “Скендэрбеў”, хоць абедзве гульні скончыліся нічыёй (0:0, 1:1). У трэцім барысаўчане аказаліся мацнейшымі за венгерскі “Дэбрэцэн” (0:1, 3:1).

Першы матч супраць “Слована” адбудзецца ў Браціславе 19 ці 20 жніўня, гульня ў адказ пройдзе на “Барысаў-Арэне” 26 ці 27 жніўня.

На сваім шляху да плэй-оф “Слован” перайграў у другім раўндзе кваліфікацыі валійскі “Н’ю-Сэйнтс” (1:0, 2:0), а ў трэцім — малдоўскі “Шэрыф” (2:1, 0:0). Самае галоўнае дасягненне славакаў у еўракубках — выхад у групавы раўнд Лігі Еўропы ў 2011 годзе.

Іншыя вынікі лёсавання:

Чэмпіёнскі шлях:

Марыбор — Селтык

Зальцбург — Мальме

Ольбарг — АПОЭЛ

Сцяўа — Лудагорац

Слован — БАТЭ

Прадстаўнікі ліг:

Бешыкташ — Арсенал

Стандард — Зеніт

Капенгаген — Байер Леверкузен

Ліль — Порту

Напалі — Атлетык

Напярэдадні лёсавання "Селтык" замяніў "Легію", якой па суме дзвюх сустрэч прайграў 2:6. Пазней высветлілася, што ў матчы ў адказ за польскі клуб згуляў дыскваліфікаваны абаронца Барташ Берашыньскі. Ён выйшаў на замену за 4 хвіліны да канца сустрэчы.

Як аказалася, у Берашыньскага перад стартам кваліфікацыйнага раўнда была чырвоная картка, і ён павінен быў прапусціць тры матчы. Гульня ў адказ з "Селтыкам" была чацвёртай. Аднак высветлілася, што абаронца не быў заяўлены на першыя дзве сустрэчы з “Сэнт-Патриксам”, таму пагашэнне дыскваліфікацыі пачалося з матчаў з "Селтыкам".

Фота: by.tribuna.com