БАТЭ ў Лізе чэмпіёнаў згуляе з ірландскім "Дандалкам"

У швейцарскім Ньёне адбылося лёсаванне футбольных Лігі чэмпіёнаў і Лігі Еўропы.

У другім кваліфікацыйным раўндзе Лігі чэмпіёнаў барысаўскі БАТЭ будзе гуляць супраць ірландскага "Дандалка". Матчы гэтага раўнду пройдуць 14-15 і 21-22 ліпеня. Першы паядынак БАТЭ правядзе дома, на "Барысаў-Арэне".

Лёсаванне 3-га раўнда Лігі чэмпіёнаў пройдзе 17 ліпеня.

Лёсаванне Лігі Еўропы вызначыла канкурэнтаў яшчэ двух беларускіх клубаў. У першым кваліфікацыйным раўндзе гэтага турніру жодзінскае "Тарпеда"-БелАЗ стартуе гасцявым матчам з албанскім "Кукесі", а салігорскі "Шахцёр" згуляе ў гасцях у паўночнаірландскага "Гленавона". Таксама ў Лізе Еўропы гуляе мінскае "Дынама", але яно ўступіць у турнір з другога кваліфікацыйнага раўнда.

Паядынкі першагага раўнда прызначаныя на 2 і 9 ліпеня. Сустрэчы другога раўнда запланаваныя на 16 і 23 ліпеня.

Фота — xsport.ua