Азараў пра відэа палёта А-50: узлёт не сведчыць пра працу абсталявання
![Расійскі ваенны самалёт А-50 / t.me/modmilby/](/sites/default/files/styles/gallery_main/public/2023-08/123123123.jpg.webp?itok=x44u6d45)
Расійскі ваенны самалёт А-50 / t.me/modmilby/
Крылы і рухавікі расійскага самалёта А-50 у Мачулішчах не былі пашкоджаныя. Мэтай атакі дронаў былі антэна і абсталяванне, пракаментаваў для Еўрарадыё кіраўнік ByPol Аляксандр Азараў.
Сёння беларускія прапагандысцкія медыя і прарасійскія тэлеграм-каналы апублікавалі відэа, на якім нібыта засняты палёт А-50 у паветры.
— Я яшчэ не глядзеў відэа, але тэарэтычна самалёт мог узляцець, бо мэтай атакі была антэна і абсталяванне. Крылы і рухавікі не былі пашкоджаныя, а ўзлёт не сведчыць пра працу абсталявання.
Раней на гэтым тыдні, расказваючы пра атаку на судна, Азараў казаў, што “самалёт больш не паляціць”. Каментуючы гэтыя словы, Азараў дадаў, што ў ByPol “спадзяваліся, што не паляціць”.
Мы запыталі Азарава, ці захавалася відэа атакі ў пілота дрона, які, па яго словах, выехаў за мяжу.
— Гэта інтрыга, — адказаў Азараў.
Раніцай 26 лютага мінчукі распавялі, што чулі выбухі ў ваколіцах ваеннага аэрадрома Мачулішчы. Увечары таго ж дня Азараў заявіў, што ўдзельнікі плана "Перамога" зладзілі атаку на самалёт далёкага радыёлакацыйнага выяўлення і кіравання А-50. На наступны дзень Аляксандр Лукашэнка зладзіў нараду з сілавым блокам, але ніякіх заяваў пра атаку на самалёт зроблена не было. У хуткім часе стала вядома, што сілавікі пачалі прыходзіць з праверкамі да ўладальнікаў дронаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.