Аптэкар: “Я назаву кошты пры СССР, але не памятаю кошты мінулага тыдня!"

Ці не падаражэюць лекі зноў напярэдадні прастуднага сезону?

Нідзе з наведаных Еўрарадыё аптэк чэргаў няма. Але, нягледзячы на працоўны час, сёй-той забягае закупіцца. Просяць "што-небудзь супрацьвіруснае ды гарачкапаніжальнае".

"Ведаеце, просяць і беларускае, і імпартнае. Але да беларускага ў некаторых менш даверу, у некаторых — да імпартнага. А вось на выхадныя як прыязджаюць расіяне, дык яны, наадварот, просяць беларускае — у іх менш даверу да свайго", — уражваюць мяне ў аптэцы, што на вуліцы Камсамольскай. Але заўважаюць: для многіх лекі аказваюцца непад'ёмнымі.

“Кошты вельмі адрозніваюцца ў залежнасці ад даты паступлення, ад партыі. Ёсць такі сайт — tabletka.by, і многія шукаюць праз інтэрнэт, дзе заляжаліся лекі і будзе танней, і ідуць туды”, — дзеляцца назіраннямі ў аптэцы.

Пытаюся ў фармацэўта пра кошты на медпрэпараты.

“Аксалінавая мазь ёсць украінская. І гэта добра, што ўкраінская, а не нашая”, — кажа фармацэўт адной з сетак прыватных аптэк. Пакуль я хаваю сваё здзіўленне ад такога непатрыятызму, фармацэўт працягвае.

"У нас ніколі не было ў прынцыпе фармацэўтычнай прамысловасці! Калі Савецкі саюз разваліўся, уся фармакалогія засталася ва Украіне — 70% было там", — кажа фармацэўт.

Пытаюся, як змяніліся кошты на антыбіётыкі ды супрацьвірусныя прэпараты.

"Ведаеце, кошты змяняюцца штодзень. Я вам назаву кошты, якія былі пры Савецкім саюзе: аспірын каштаваў шэсць рублёў — але не магу назваць кошты, якія былі на мінулым тыдні!" — выдае медык.

Колькі каштуе самы прыблізны набор супраць прастуды, падлічваем разам з аптэкарам.

Да прыкладу, аксалінавая мазь — 6 350 (у лістападзе 2011 года была 4 370), "Арпетол" 30 таблетак — 77 550 (52 650), кроплі для носа — 26 900 (13 880), бутамінафен — 7 500 (5 500 рублёў). Атрымліваецца, за прыблізны набор лекаў трэба аддаць каля 120 тысяч рублёў, два гады таму — 77 тысяч за ўвесь набор! Гэта як зараз каштуе толькі "Арпетол".

Ці не падаражэюць лекі зноў напярэдадні прастуднага сезону?

Дырэктар фармацэўтычнай кампаніі “Лекфарм” Андрэй Патаповіч заўважае Еўрарадыё, што лекі павышацца ў коштах не будуць.

“Не будуць даражэць. За два гады той жа “Арпетол” на колькі падаражэў — мо на 30%? А вось вы заўважце, як падаражэлі імпартныя лекі!” — гаворыць кіраўнік кампаніі.

А вось на РУП “Белмедпрэпараты” ніякіх каментароў не даюць, калі і як падаражэюць лекі, і толькі мяркуюць, што рост коштаў не за гарамі.

“Канечне, будуць даражэць! Вы глядзіце, як долар прэ, як даражэе электраэнергія. А яшчэ імпартныя лекі нам на пяткі наступаюць. Таму калі родныя гадамі карыстаюцца нейкімі прэпаратамі, няхай трошачкі закупяць”, — кажуць на прадпрыемстве.

Хоць сказаць, калі адбудзецца падаражэнне, не могуць.