Апроч урокаў настаўнікі выбіваюць даўгі і сочаць, як жывуць школьнікі
…а таксама прыбіраюць лісце, снег і “Чыжоўка-Арэну”. Лукашэнка другі раз абяцае разгрузіць педагогаў ад лішняй працы.
"Я мяркую, што адпаведная група вывучае, а дакладней сістэматызуе пытанні, каб нарэшце вызваліць настаўнікаў ад неўласцівых функцый і прымусіць іх займацца толькі сваёй справай — перадачай ведаў і навучаннем дзяцей ды выхаваннем іх", — сказаў кіраўнік краіны падчас нарады па ўдасканаленні аграрнай палітыкі.
Аляксандр Лукашэнка абяцаў пазбавіць настаўнікаў лішняй працы больш за год таму, калі адказваў на пытанні журналістаў на прэс-канферэнцыі.
“Я дазваляю вам (настаўнікам) нічога не пісаць. Але выдавайце тавар так, каб на тэставанні былі нармальныя веды”, — падкрэсліваў тады кіраўнік дзяржавы.
Лішняй працы стала толькі больш з таго часу, ацэньвае выкладчык беларускай мовы і літаратуры з Мінска Максім.
“Перад чэмпіянатам прымушалі прыбіраць “Чыжоўка-Арэну”. Гэта замест урокаў. У школе адны санітаркі засталіся. Нас абавязваюць наведваць музеі, канцэрты, хакеі, футболы. У інструкцыі напісана, што мы мусім выхоўваць у дзецях прыгожае, але ж не два разы на тыдзень! Пасля наведванне кватэры злосных неплацельшчыкаў — і мы мусім з гэтым разбірацца”, — пералічвае Еўрарадыё настаўнік і прыводзіць прыклад “выкалочвання даўгоў”.
“Было такое: прыходжу у кватэру, а там жанчына на тры літары пасылае. Па нашых інструкцыях мы павінныя выконваць усё. Той жа збор грошай у вучняў, каб аплаціць харчаванне ў сталоўцы. Але збольшага вінаватыя самі настаўнікі, бо іх хапае толькі на стогны ў настаўніцкай”, — даводзіць Максім.
З настаўнікаў — падпіска на выданні, і абследаванне ўмоваў, у якіх жывуць школьнікі, прычым яны могуць вучыцца ў іншай школе, але быць прапісанымі ў гэтым раёне, дзеліцца Юля, якая выкладае гісторыю ў мінскай школе.
“Зверху спускаецца план, і настаўнікі вырашаюць, хто які часопіс будзе выпісваць. Некалькі разоў на год трэба адсочваць, дзе знаходзяцца няпоўнагадовыя дзеці. Гэта ў верасні робіцца і ў студзені. Кватэр можа быць як тры, так і 40. Гэта робяць усе выкладчыкі па чарзе”, — тлумачыць настаўніца.
Класнага кіраўніцтва ёй пакуль удаецца пазбегнуць.
122 тысячы настаўнікаў працавалі ў школах Беларусі ў 2013 годзе. Толькі адна мінская школа сёлета шукае адразу 6 настаўнікаў. Сярэдні заробак у настаўнікаў у першым квартале гэтага года — 4,4 мільёна, падлічвае Белстат.
Фота: mn.ru