Ці гатовыя беларусы прагаласаваць за жанчыну? Экспертка тлумачыць нюансы
![Выбары ў Беларусі](/sites/default/files/styles/gallery_main/public/2024-02/photo_2024-02-25_14-07-09.jpg.webp?itok=DS9CSYhj)
Выбары ў Беларусі / БелТА
Беларусы перастаюць верыць у ідэю жанчыны-прэзідэнткі? Прынамсі, такое ўражанне можа скласціся, калі глядзець апошняе апытанне Chatham House. У ім колькасць беларусаў, якія гатовыя прагаласаваць за жанчыну на прэзідэнцкіх выбарах, крыху зменшылася.
![Ці гатовыя беларусы прагаласаваць за жанчыну? Экспертка тлумачыць нюансы](/sites/default/files/styles/default_image_paragraph/public/paragraphs/image/Screenshot%202024-09-10%20at%2013.45.59.png.webp?itok=c79pGDMy)
Гендарная даследчыца Ірына Сідорская звяртае ўвагу на тое, што гэтыя звесткі сведчаць пра змену кантэксту і абставінаў, у якіх аказаліся беларусы ў апошнія гады:
— Гэта не беларусы здурнелі ці сталі больш кансерватыўнымі за два гады ( гэта пярэчыць здароваму сэнсу). Людзі даюць адказы, якія яны лічаць правільнымі.
Лукашэнка яшчэ ў 2020 годзе сказаў, што “грамадства не гатовае галасаваць за жанчыну”, і “Канстытуцыя ў нас не пад жанчыну”, “і яна [жанчына], бедалага, не справіцца” — гэта тэзіс, які прагучаў з самай галоўнай трыбуны.
Вядома, большасць беларусаў была з ім не згодная. Але цана нязгоды з Лукашэнкам вельмі вырасла за гэтыя чатыры гады, і нават за два, з 2022 да 2024-га. Людзі проста не хочуць гаварыць тое, што не ўхваляецца на дзяржаўным узроўні. Калі дзяржава ёсць і ў школе, і ў працоўных калектывах — усюды, гаварыць у сваім адказе “не, я не згодны (не згодная) з кіраўніком дзяржавы” — гэта як бы не зусім камільфо.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.