Стала вядома пра масавы сыход студэнтаў з мінскага ўніверсітэта — "Наша Ніва"
![Мінскі дзяржаўны лінгвістычны ўніверсітэт](/sites/default/files/styles/gallery_main/public/2024-09/injaz-0609.jpg.webp?itok=5nofRgry)
Мінскі дзяржаўны лінгвістычны ўніверсітэт / yandex.net
Студэнты масава пакідаюць Мінскі дзяржаўны лінгвістычны ўніверсітэт (МДЛУ). Пра гэта піша "Наша Ніва" са спасылкай на свае крыніцы ў сферы адукацыі.
Ад пачатку 2022 года да восені 2023-га з МДЛУ па ўласным жаданні адлічыліся больш за 1000 студэнтаў — як дзённай, так і завочнай формы разам з "мэтавікамі".
Паведамляецца, што найбольш добраахвотна адлічаных складаюць студэнты дзённай формы навучання — каля 900 чалавек. Дакументы з універсітэта забралі таксама больш за 100 завочнікаў і дзясятак "мэтавікоў".
Інфармацыі за 2024 год яшчэ няма, бо МДЛУ пакуль не падаваў яе ў Мінадукацыі.
Крыніцы НН кажуць пра недабор студэнтаў, асабліва завочнай формы. "Так, паводле вызначанай для МДЛУ дзяржаўнай ліцэнзіі на колькасць студэнтаў (яна патрабуе наяўнасць у ВНУ 6320 студэнтаў дзённай формы і 2070 завочнікаў), Лінгвістычнаму на канец 2023 года не хапала больш за 500 студэнтаў дзённай формы і больш за 1000 завочнікаў", — дзеляцца яны дэталямі.
Недабор студэнтаў у ВНУ былі вымушаныя прызнаць і ўлады. Міністр адукацыі Андрэй Іванец 27 жніўня сказаў, што сёлета ВНУ краіны агулам недабралі каля 870 чалавек.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.