Андрэю Дзмітрыеву прысудзілі 1,5 года калоніі

Андрэю Дзмітрыеву прысудзілі 1,5 года калоніі агульнага рэжыму. Палітыка, грамадскага дзеяча, экс-кандыдата ў прэзідэнты Беларусі прызналі вінаватым ва ўдзеле ў вулічных пратэстах 2020-га (у "арганізацыі і падрыхтоўцы дзеянняў, якія груба парушаюць грамадскі парадак, або актыўным удзеле ў іх"). Справу разглядаў суд Маскоўскага раёна Мінска (суддзя — Кацярына Мурашка). 

Беларускія праваабаронцы прызналі Дзмітрыева палітвязнем.

Пра затрыманне Андрэя Дзмітрыева стала вядома ў студзені сёлета. Раней ён быў кіраўніком руху "Гавары праўду", а ў 2020 годзе — кандыдатам у прэзідэнты Беларусі. Пасля выбараў працаваў над стварэннем палітычнай партыі. У сацсетках апублікаваў пост з крытыкай законапраекта аб палітычных партыях і грамадскіх аб'яднаннях у РБ. 

Па версіі Следчага камітэта, "устаноўлена датычнасць [Дзмітрыева] да экстрэмісцкай дзейнасці". Сцвярджалася, што ў жніўні-верасні 2020-га ён удзельнічаў у "вулічных беспарадках" у сталіцы. А яшчэ следчыя падлічылі, што палітык 599 разоў праязджаў праз мяжу, з іх 33 разы — пасля 2020 года. Ці ж гэта крымінал, паездкі за мяжу?

Кур'ёзным выглядае заява СК пра кантакты Андрэя Дзмітрыева "з прадстаўнікамі Захаду і ЗША" (згадвалася Хілары Клінтан, фота з ёй цяпер у крымінальнай справе!), а гэта "можа сведчыць пра каардынацыю яго "палітычнай" дзейнасці з-за мяжы"!