Аляксандра Лукашэнку ў школьным падручніку залічылі да геніяльных дзеячаў
![Аляксандра Лукашэнку ў школьным падручніку залічылі да геніяльных дзеячаў](/sites/default/files/styles/gallery_main/public/2023-08/padru4nik-0111-1.jpg.webp?itok=onn0wFvM)
У падручніку "Грамадазнаўства" за 9-ы клас Аляксандр Лукашэнка называецца выбітным палітыкам. Аўтары падручніка не сумняюцца ў яго геніяльнасці.
Як паведамляе тэлеканал "Белсат", у раздзеле "Роля асобы ў гісторыі" Лукашэнка названы прыкладам выбітнага палітыка. Ён згадваецца ў адным шэрагу з Платонам, Арыстоцелем, Леанарда да Вінчы, Ньютанам, Шэкспірам ды іншымі.
"Выбітны палітык кажа людзям тое, да чаго яны ўжо ўнутрана падрыхтаваныя, і яднае іх для рашэння задачы, важнасць якой яны здольныя зразумець і прыняць. Прыкладам можа служыць першы прэзідэнт Рэспублікі Беларусь А.Р. Лукашэнка", — пішуць аўтары падручніка.
Далей яны робяць выснову: "Геніяльнасць гістарычнай асобы палягае ва ўменні выявіць наяўныя магчымасці, улавіць змены, якія саспелі ў грамадстве і ўзначаліць рух, які забяспечвае пераўтварэнне гэтых магчымасцяў у рэчаіснасць".
Фота: belsat.eu