Аляксандр Лукашэнка выказаў спачуванні родным і блізкім Сяргея Жураўля

Аляксандр Лукашэнка выказаў спачуванні родным і блізкім народнага артыста Беларусі Сяргея Жураўля. Ён памёр 14 жніўня, на 62-м годзе жыцця.

Як паведамілі БЕЛТА ў прэс-службе кіраўніка дзяржавы, у спачуванні ёсць такія радкі: "Творчасць Сяргея Барысавіча яркімі старонкамі ўпісана ў гісторыю сучаснага беларускага мастацтва. Унікальны талент і бліскучае выканальніцкае майстэрства гэтага артыста знайшлі сваё ўвасабленне ў мностве выдатных роляў, якія аказалі значны ўплыў на развіццё беларускага тэатра і заваявалі любоў гледачоў розных пакаленняў".

Развітанне з Сяргеем Жураўлём адбудзецца сёння на сцэне тэатра імя Янкі Купалы, яно пачнецца а 11-й гадзіне. З 12.30 да 13.00 будзе грамадзянская паніхіда, яна пройдзе таксама на сцэне тэатра. На 14-ю гадзіну запланаванае пахаванне на Усходніх могілках сталіцы.

Журавель быў акцёрам Купалаўскага тэатра з 2009 года. Ён вядомы і па шматлікіх ролях у беларускіх і расійскіх фільмах, зняўся больш чым у 60 стужках.

Фота: kupalauski.by