Афганскія дзеці п'юць гарбату замест малака, бо ў маці няма грошай — #ІхНоравы

Пазней у будынку, з якога выйшлі закладнікі, правялі ператрус. І знайшлі белую тканіну, на якой людзі рэшткамі ежы напісалі: "SOS" і "Дапамажыце, тры закладнікі".

Ізраільскія афіцыйныя асобы прызналі, што забойства трох чалавек, якія трымалі ў руках белы сцяг, было парушэннем правілаў вядзення баявых дзеянняў.

Усе флэшбэкі не выпадковыя

Ганконг таксама пераследуюць флэшбэкі аднаго пратэснага лета. Цяпер там судзяць прадэмакратычна настроенага медыямагната Джымі Лая, яго абвінавачваюць у змове з замежнымі дзяржавамі. І калі яго віну дакажуць, Лаю будзе пагражаць пажыццёвае зняволенне.

Яго справа выклікала міжнародны рэзананс, за ёю ўважліва сочаць ва ўсім свеце, бо гэта тэст на незалежнасць судовай улады Ганконга. Журналісты заўважаюць, што Лай прыкметна схуднеў з моманту папярэдніх судовых слуханняў, але ён усміхаўся і махаў сваякам.

Медыямагнат — адзін з больш чым 250 актывістаў, якіх у Ганконгу затрымалі па падазрэнні ў парушэнні закона аб нацыянальнай бяспецы. Гэты закон увёў Пекін у 2020 годзе ў адказ на масавыя пратэсты ў Ганконгу. Кітай настойвае, што закон неабходны для ўтаймавання беспарадкаў.

Лай — заўзяты крытык Камуністычнай партыі Кітая і адзін з самых высокапастаўленых людзей, арыштаваных па гэтым законе.

Нічога не нагадвае?

Хто твой сябар?

Паўднёвая Карэя кажа, што КНДР запусціла сваю самую сучасную ракету вялікай далёкасці. Яна прызямлілася ў моры на захад ад японскага вострава Хакайда.

Запуск адбыўся неўзабаве пасля таго, як прадстаўнікі міністэрстваў абароны Паўднёвай Карэі і ЗША сустрэліся, каб пагаварыць пра тое, як рэагаваць на магчымую ядзерную атаку Пхеньяна. І так, ЗША гэта таксама датычыць, бо міжкантынентальныя балістычныя ракеты могуць дасягнуць іх берагоў.

А пакуль Сеул дамаўляецца з Вашынгтонам, Пхеньян наладжвае сувязі ў іншым баку — Кім Чэн Ын усё больш паглыбляе партнёрства з Расіяй і Кітаем.

Расійскі прэзідэнт Уладзімір Пуцін вядомы сваёй любоўю да прымавак, таму рэзюмуем так: "Скажы мне, хто твой сябар..." А далей вы ведаеце самі.

“Дзеці зноў спяць галоднымі”

"Мінулым разам я змагла купіць малако для дзіцяці два месяцы таму. Звычайна я проста напаўняю бутэлечку гарбатай. Або замочваю хлеб у гарбаце і потым кармлю ім дзіця", — расказвае афганская жанчына Сахаіла Ніязі.

Талібан у Афганістане ўсё мацнейшы — як і голад. Цяпер харчовая праграма ААН гатовая забяспечыць толькі 3 млн жыхароў Афганістана — а дапамога патрэбная 10 мільёнам.

І многія аказаліся на мяжы голаду. У тым ліку і сям'я ўдавы Сахаілы — працаваць пры ўладзе Талібану жанчына не можа і цалкам залежыць ад міласэрнасці суседзяў і сваякоў.

"Бывалі ночы, калі нам не было чаго есці. Я кажу дзецям: куды мне пайсці прасіць міласціну ў такі час ночы? Яны спяць галоднымі, а я не ведаю, што мне рабіць. Калі сусед прыносіць нам трохі ежы, дзеці лезуць да яго, прыгаворваючы: "Дай мне, дай мне", — расказвае жанчына.

ВВС звярнулася з пытаннямі да галоўнага прадстаўніка ўрада Талібана Забіхулы Муджахіда. Што талібы робяць, каб пераканаць міжнародную супольнасць даць больш дапамогі? Але, як аказалася, талібы лічаць, што ў міжнароднай супольнасці проста няма грошай, а кавід і вайна ва Украіне спустошылі ўсе запасы.