20 выкладчыкаў БДУІР плануюць далучыцца да студэнцкай забастоўкі

Акрамя студэнтаў, прадпрыемстваў і прыватных кампаній, да нацыянальнай забастоўкі, абвешчанай Святланай Ціханоўскай, далучаюцца ўніверсітэцкія выкладчыкі. Пра свой удзел абвясцілі больш за 20 супрацоўнікаў БДУІР. Цяпер яны збіраюць спіс аднадумцаў:

— Спіс пакуль бачылі не ўсе зацікаўленыя асобы. То-бок не ўсе дадалі сябе, — расказвае Еўрарадыё выкладчыца БДУІР, якая папрасіла захаваць яе ананімнасць.

Па словах нашай суразмоўніцы, у кожнага выкладчыка, які далучаецца да забастоўкі, свае формы ўдзелу ў ёй.

— Нехта не прымае працы і проста размаўляе на занятках на агульныя тэмы. Іншы выдае заданне і сядзіць моўчкі. Іншы наогул не прыходзіць на заняткі.

Выкладчыца дадала, што частка супрацоўнікаў падтрымлівае забастоўку, але не хоча актыўна ў ёй удзельнічаць. Некаторыя не разумеюць, у якой форме яны могуць гэта зрабіць.

Ёсць і тыя, хто супраць забастоўкі. Ціску з боку кіраўніцтва БДУІР, дадала суразмоўніца, пакуль не было. Але яго чакаюць.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.