20 тон беларускага сала знішчылі ў Расіі
Сала з Беларусі / Рассяльгаснагляд
У Расіі затрымалі і знішчылі 20,4 тоны сала з Беларусі. Яго везлі з Мінскай вобласці ў Маскву.
Як паведамляе прэс-служба Рассяльгаснагляду, аўтамабіль з салам спынілі ў Смаленскай вобласці 13 сакавіка. Вытворцам быў пазначаны Стаўбцоўскі мясакансервавы камбінат.
Кіроўца падаў ветэрынарны сертыфікат з адзнакамі пра ветэрынарны кантроль у афіцыйным пункце ўвозу. Але дакумент аказаўся падробленым. На палетах не было адбіткаў клеймаў, якія пацвярджаюць, што тавар прайшоў ветэрынарна-санітарную экспертызу ў Беларусі.
Прадстаўнікі Рассельгаснагляду звязаліся з Дэпартаментам ветэрынарнага і харчовага нагляду Беларусі. Беларускае ведамства не пацвердзіла паходжанне і бяспеку прадукцыі.
Паведамляецца, што 21 красавіка сала ўтылізавалі. А перавозчыка прыцягнулі да адміністрацыйнай адказнасці.
