Знойдзена ўжо 219 целаў пасажыраў самалёта, збітага на Данбасе

Пра гэта заявіў на брыфінгу кіраўнік Дзяржаўнай камісіі па расследаванні прычын катастрофы Уладзімір Гройсман, перадае УНІАН. Ён адзначыў, што гэта дадзеныя, апроч тых 192 целаў і 8 фрагментаў, якія ўжо загружаныя ў цягнік і павінны быць адпраўленыя з чыгуначнай станцыі ў Торэзе.

“На гэты момант за апошнія гадзіны было знойдзена яшчэ дадаткова 27 целаў плюс 20 фрагментаў бязвінна загінулых людзей”, — сказаў Гройсман. Ён дадаў, што “для іх асобна ёсць рэфрыжаратар, у які яны будуць загружаныя” і перавезеныя ў цягнік, гатовы да адпраўкі.

17 ліпеня ў небе над Данеччынай быў збіты цывільны пасажырскі самалёт Малазійскіх авіяліній. Паводле дадзеных украінскіх вайскоўцаў і выведкі ЗША, яго збіла ракета, выпушчаная з падкантрольнай прарасійскім баевікам тэрыторыі. Расійскія ўлады ў сваю чаргу абвінавачваюць у інцыдэнце ўкраінскіх вайскоўцаў.

На борце самалёта знаходзілася 298 чалавек, усе яны загінулі. Пошукавым працам замінаюць узброеныя сепаратысты.