Следчы камітэт пасля праверкі ў студзені 2019 года адмовіўся пачынаць крымінальную справу. Маці салдата ў афіцыйную версію не паверыла і паскардзілася ў Генпракуратуру. Паўторная праверка Следчага камітэта таксама скончылася адмовай пачынаць справу.
У гутарцы з карэспандэнтам Еўрарадыё жанчына расказвала, што за дзень да трагедыі яна скончыла збіраць даведкі для таго, каб сына камісавалі з войска — для дапамогі маці. На шыі салдата, па словах маці, былі выяўленыя дзве барозны вяроўкі: на яе думку Аляксандра спярша прыдушылі, а потым павесілі.
Маці Арлова зноў напісала скаргу, пасля якой ведамства пачало крымінальную справу за давядзенне да самагубства.
У артыкуле Кацярыны Андрэевай на сайце belsat.eu (ад 6 верасня 2018 года) некалькі былых саслужыўцаў загінулага распавядалі пра гвалт, абразы і прыніжэнні з боку камандавання. Там гаварылася, быццам афіцэры ўжывалі спірт падчас вайсковых вучэнняў, прымушалі жаўнераў адціскацца, збівалі іх, а адзін быццам бы "зачыняўся ў кабінеце" з хлопцамі.
Рэдакцыя не мела магчымасці праверыць факту гвалту, таму прозвішчы афіцэраў не называліся, а імёны і прозвішчы крыніц былі змененыя з этычных меркаванняў.
У кастрычніку 2018 года адзін з суразмоўцаў затэлефанаваў журналістцы і паведаміў, што з ім сустракаліся работнікі пракуратуры і распытвалі пра нестатутныя адносіны ў вайсковай часці. Сярод іншага яны пыталіся, ці размаўляў ён з журналісткай "Белсата" Кацярынай Андрэевай. Але з самой карэспандэнткай ніхто тады не размаўляў.
20 студзеня 2020 года Андрэевай затэлефанаваў следчы са Слоніма і папрасіў назваць імёны і прозвішчы яе крыніц, а таксама спосаб камунікацыі з імі. Журналістка адказала, што ўжо не памятае такія дэталі, бо прайшло шмат часу з моманту публікацыі.
29 студзеня Андрэеву па тэлефоне выклікалі ў Следчы камітэт як сведку па крымінальнай справе за злоўжыванне ўладай або службовымі паўнамоцтвамі, звязанае з гвалтам або здзейсненае з прымяненнем зброі.
Стандарты журналісцкай этыкі прадугледжваюць абарону крыніцы інфармацыі. Але ў адпаведнасці з артыкулам 39 "Закону аб СМІ" журналіст абавязаны раскрыць крыніцу, якая перадала яму звесткі, калі гэтага патрабуе орган крымінальнага пераследу ў межах расследавання.
На допыт Андрэева збіраецца ісці разам са сваім прадстаўніком, адвакатам Сяргеем Зікрацкім.
