Зборная Беларусі па індорхакеі заваявала бронзу на чэмпіянаце Еўропы
Жаночая зборная Беларусі па індорхакеі заваявала трэцяе месца на чэмпіянаце Еўропы. 24 студзеня ў мінскім Палацы спорту нашы спартоўкі перамаглі саперніц з каманды Нямеччыны з лікам 6:5, перадае БЕЛТА.
Лік у сустрэчы адкрыла капітан каманды гаспадароў Рыта Батура на 3-й хвіліне, А потым Крысціна Папкова павялічыла адрыў да 2:0. Праўда, немкі да канца першага тайма здолелі адыграцца і зраўняць лік — 2:2. У другім тайме матча каманда гасцей спярша нават выйшла наперад — 4:3. Але потым беларускі ўсё ж апынуліся мацнейшымі і святкавалі перамогу — 6:5.
Як паведамлялася раней, наша зборная не змагла выйсці ў фінал турніру, зазнаўшы паразу ў серыі пенальці ў паўфінале ад полек. Аднак і самі полькі ў барацьбе за першае месца саступілі зборнай Нідэрландаў — 2:6.
Выніковае становішча чэмпіянату: 1. Нідэрланды. 2. Польшча. 3. Беларусь. 4. Нямеччына. 5. Украіна. 6. Чэхія. 7. Аўстрыя. 8. Бельгія. Па выніках турніру шэсць зборных атрымалі права ўдзельнічаць у чэмпіянаце свету 2018 года. Ён пройдзе ў Аргенціне.
