Затрымалі двух беларусаў, якія вярнуліся на радзіму з Польшчы
![Затрымалі двух беларусаў, якія вярнуліся на радзіму з Польшчы](/sites/default/files/styles/gallery_main/public/2023-08/elkin-0308.jpg.webp?itok=KC8P-FUd)
Стала вядома пра затрыманне двух беларусаў, якія некалькі гадоў жывуць у Польшчы і нядаўна прыехалі на радзіму ў госці да сваякоў.
"Віцебская вясна" паведамляе пра затрыманне прадпрымальніка Барыса Элькіна. Ён мае будаўнічы бізнес у Польшчы і час ад часу прыязджаў на радзіму. 1 жніўня яго затрымалі ў Віцебску, а ў доме правялі ператрус. Прычыны затрымання дакладна не вядомыя.
Элькін быў адным з ініцыятараў галадоўкі прадпрымальнікаў, якая праходзіла ў Віцебску ў 2004 годзе. Пасля 2010-га ён з'ехаў у Польшчу і стаў сузаснавальнікам кампаніі Bel.Pol.Bud.spzoo, якая наймае на працу беларусаў і дапамагае ўцекачам з Украіны.
Праваабаронцы мяркуюць, што затрымаць яго маглі за фатаграфіі з беларускай нацыянальнай сімволікай у сацсетках. Беларускія сілавікі лічаць гэта несанкцыянаваным пікетам.
Іншы беларус, Раман Галуза з Жабінкі, жыў у Польшчы апошнія дзевяць гадоў. 19 ліпеня ён прыехаў на радзіму і знік, піша zerkalo.io. Мужчыну шукалі з дапамогай пошукава-ратавальнага атрада "Паўднёвы Захад". Ягоная бабуля пісала заяву ў міліцыю пра знікненне ўнука.
2 жніўня ў акаўнтах пашуковікаў з'явілася інфармацыя, што Галуза жывы і яго месцазнаходжанне выяўленае, аднак ніякіх іншых падрабязнасцяў не паведамлялася. Адзін з беларускіх блогераў у Польшчы паведаміў, што Галуза знаходзіцца ў СІЗА КДБ.
Галуза скончыў у Польшчы ўніверсітэт, атрымаў грамадзянства, займаўся валанцёрствам — у тым ліку дапамагаў беларускім бежанцам.
![Затрымалі двух беларусаў, якія вярнуліся на радзіму з Польшчы](/sites/default/files/styles/default_image_paragraph_watermark/public/paragraphs/image/haluza-0308.jpg.webp?itok=OwT5XUvc)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.