За 7 км ад МКАД хочуць пабудаваць даследчы ядзерны рэактар
За 7 кіламетраў ад МКАД хочуць пабудаваць даследчы ядзерны рэактар. Гэта вынікае з мемарандуму, падпісанага 25 жніўня ўрадамі Беларусі і Расіі. У планах — будаўніцтва сумесна з расійскай кампаніяй “Расатам” даследчага ядзернага рэактара і Цэнтра ядзерных даследаванняў у “Соснах”.
Паводле цяперашніх планаў, трэці рэактар (першыя два — на БелАЭС) маюць запусціць “у сярэдзіне наступнага дзесяцігоддзя”. І калі першыя два рэактары будуць “падтрымліваць эканоміку”, то трэці будзе працаваць толькі ў навуковых мэтах.
Пра пабудову ў “Соснах” ядзернага рэактара казалі прынамсі апошнія пяць год. У савецкія часы там дзейнічаў даследчы атамны рэактар ІРТ-1000 магутнасцю да 4 МВт, у 1980-я былі створаныя мабільныя атамныя электрастанцыі “Памір”, якія размяшчаліся на колавых цягачах, маглі выпрацоўваць каля 1 МВт і нібыта маглі абслугоўвацца адным салдатам. Адна з установак прайшла выпрабаванні, але пасля катастрофы на Чарнобыльскай АЭС абедзве збудаваныя ўстаноўкі “Памір” былі знішчаныя. Ад адной ва ўнутраным дворыку інстытуту пакінулі корпус рэактара, паведамляе Радыё Свабода.
