Японскія чыноўнікі спрабуюць рассмяшыць людзей — навошта ім гэта?

У адной японскай прэфектуры вырашылі заканадаўча заахвочваць жыхароў смяяцца, піша мясцовае выданне Asahi. І дадае — гэта не жарт.

Прынятая пастанова заклікае жыхароў прэфектуры "старацца ўмацоўваць фізічнае і псіхалагічнае здароўе з дапамогай смеху, напрыклад, смеючыся не радзей за адзін раз на дзень".

А ўладальнікаў бізнесу заклікаюць "ствараць на працоўным месцы атмасферу, напоўненую смехам". А восьмы дзень кожнага месяца абвясцілі "днём, калі жыхары прэфектуры могуць умацоўваць здароўе з дапамогай смеху".

Пастанову прынялі не проста так, а пасля вывучэння даследавання медыцынскага факультэта Універсітэта Ямагата. Яно паказала, што людзі, якія часта смяюцца, маюць больш нізкую рызыку ранняй смерці.

Знайшліся і праціўнікі пастановы. Яны кажуць, што смяяцца ці не смяяцца — адно з асноўных правоў чалавека, гарантаваных Канстытуцыяй. Гэта значыць, калі Канстытуцыя гарантуе свабоду думкі і веравызнання, то і права смяяцца па ўласным рашэнні таксама пакідае за чалавекам.

Але прыхільнікі пастановы кажуць, што новы дакумент не прымушае, а заахвочвае чалавека смяяцца.