Як працуюць, так і зарабляюць. 7 цытат новай кіраўніцы Адміністрацыі прэзідэнта
![Як працуюць, так і зарабляюць. 7 цытат новай кіраўніцы Адміністрацыі прэзідэнта](/sites/default/files/styles/gallery_main/public/2023-08/kaczanava1.jpg.webp?itok=U97Vq2S7)
Кар'ерны рост Наталлі Качанавай — імклівы. Да 2002-га года яна — радавы інжынер ў сістэме полацкага ЖКГ. Потым вылучаецца на дзяржаўную службу: спачатку працуе начальнікам аддзела жыллёва-камунальнай гаспадаркі Полацкага гарвыканкама, потым — намеснікам старшыні па капітальным будаўніцтве і ЖКГ. З лістапада 2007-га Качанава — старшыня Наваполацкага гарвыканкама. У 2012 годзе выбраная ў склад Савета Рэспублікі ад Віцебскай вобласці. 27 снежня 2014-га прызначаная намеснікам прэм'ер-міністра. А 21 снежня 2016-га года становіцца кіраўніком Адміністрацыі прэзідэнта.
На папярэдняй пасадзе Наталля Качанава курыравала сацыяльную сферу. Чым нам запомніцца цяпер ужо былая віцэ-прэм'ер?
1. Пра моцных жанчын ва ўладзе:
"Вы ведаеце, няма. Я не сказала б, што я моцная жанчына. Але стрыжань ёсць, вядома, як у кожнага чалавека".
2. Пра мінулае і перамены:
"Стала асцярожна ставіцца да ўсіх перамен. У практыцы мінулага ёсць шмат добрага, і добра, што мы ў нашай краіне гэта захавалі".
(адказваючы на пытанне пра магчымы перагляд дзяржаўных святаў)
3. Аб супрацьдзеянні абортам:
"Мы пачалі гэтую працу, сапраўды, і пайшлі ў навучальныя ўстановы, да старшакласнікаў. Вы ведаеце, гэта знайшло такі водгук у маладых людзей, і ў першую чаргу, у хлопцаў! Не ў дзяўчат, а ў хлопцаў. Гэта значыць, яны вельмі эмацыйна ўсё гэта ўспрымалі. Я лічу, што гэта правільныя падыходы. У жыцці чалавек павінен сябе планаваць. Таму гэтую працу пачалі актыўна. Далучылася Міністэрства аховы здароўя, мы ім ўдзячныя.
Я не думаю, што патрэбны нейкі адміністрацыйны рычаг, я думаю, што тут больш павінна быць праца з людзьмі. Такая праца, якая даходзіць да розуму, да сэрца кожнага чалавека".
4. Пра заробкі медыкаў...
"...як працуюць, так і зарабляюць".
"Малады чалавек, які прыходзіць вучыцца ў медыцынскую ВНУ, наўрад ці разлічвае атрымліваць велізарную зарплату", — дадала тады ж Качанава.
5. ...і пра заробкі спартыўных трэнераў:
"Вось прыходзіць малады трэнер на зарплату 1,3 мільёна. Ну што паробіш, такая зарплата! Наогул, чалавек, які скончыў школу, выразна павінен прадстаўляць, якая зарплата яго чакае на месцы трэнера ніжэйшага звяна. Разлічваць на тое, што там ён атрымае вялікія фінансавыя бонусы, наўрад ці варта.
На гэтыя месцы павінен быць вельмі сур'ёзны падбор кадраў. Туды трэба накіроўваць тых, хто хоча займацца трэнерскім рамяством, можа ім займацца і хто адэкватна ўспрыме гэты перыяд з заробкам 1,3 мільёна. Вы ўсе гасударавы людзі і павінны разумець сітуацыю ў краіне".
![Як працуюць, так і зарабляюць. 7 цытат новай кіраўніцы Адміністрацыі прэзідэнта](/sites/default/files/paragraphs/image/kachanava2.jpg)
6. Пра СМІ і "дэградацыю розумаў":
"Людзі штодня чэрпаюць інфармацыю пра тое, што адбываецца ў краіне, са сродкаў масавай інфармацыі. І сёння трэба ставіць заслону дэградацыі розумаў, што назіраецца. Інфармацыя, што транслюецца праз СМІ, павінна быць дакладнай і аб'ектыўнай. Калі інфармацыя вырываецца з кантэксту, пераварочваецца і падаецца па-іншаму, вядома, гэта выклікае рэакцыю людзей. Навошта абмяркоўваць скажоныя факты? Гэтага проста не павінна быць".
(гэтая цытата з'явілася пасля таго, як СМІ растыражавалі выказванне Качанавай пра заробкі дактароў)
7. Пра сумныя школьныя падручнікі:
"Я папрасіла прынесці мне падручнікі і сама ўсё ўбачыла. Вы маеце рацыю, часам напісана няпроста, так, што трэба дзесяць разоў прачытаць самому, каб зразумець".