Вы тут

Вярхоўны суд разглядае апеляцыю па справе аб нападзе на мінскую настаўніцу

Фота Марыі Калеснікавай, Еўрарадыё

19 верасня судовая калегія па крымінальных справах Вярхоўнага суда Беларусі разглядае апеляцыю па справе аб нападзе на настаўніцу мінскай гімназіі № 74. Працэс пачаўся ў 9.30 і праходзіць за зачыненымі дзвярыма. Журналістаў папрасілі пакінуць залу пасяджэнняў.

У красавіку 2017-га гімназіст Данат Скакун быў прызнаны вінаватым у нападзе на настаўніцу і асуджаны да 8 гадоў пазбаўлення волі з адбыццём пакарання ў выхаваўчай калоніі. Такое рашэнне вынес Мінскі гарадскі суд (таксама за зачыненымі дзвярыма). Напад адбыўся ў гімназіі 23 траўня 2016 года. Паводле афіцыйнай версіі, дзевяцікласнік раніцай зайшоў у клас, у якім была толькі адна 57-гадовая настаўніца рускай мовы, і нанёс ёй шматлікія ўдары вострым прадметам. Сваякі і сябры Даната Скакуна з прысудам не згодныя, звяртаюць увагу на шматлікія нестыкоўкі ў справе. Следчы камітэт паабяцаў, што пасля разгляду апеляцыі і ўступлення прысуду ў сілу выступіць з заявай наконт гэтай справы, каб зняць усе пытанні, якія ўздымаюцца ў СМІ.