Вярхоўны суд не змяніў прысуд 16 фігурантам справы ашмянскіх мытнікаў

Вярхоўны суд пакінуў без змены прысуд 16 ашмянскім мытнікам, паведамляе БЕЛТА са спасылкай на прэс-службу суда.

Судовая калегія па крымінальных справах Вярхоўнага суда разгледзела апеляцыю на прысуд Мінскага аблсуда ад 8 жнiўня 2017 года. Прысуд аспрэчвалі 16 былых супрацоўнікаў мытнага пункта пропуску "Каменны Лог" Ашмянскай мытні. У выніку прысуд пакінуты без змены, а апеляцыйныя скаргі — без задавальнення.

Мытнікаў асудзілі за хабар пры выплаце мытных плацяжоў. Суд прызначыў ім пакаранне ў выглядзе пазбаўлення волі. Максімальнае пакаранне склала 11,5 года калоніі ўзмоцненага рэжыму. Двух чалавек суд прыгаварыў да абмежавання волі. Літоўскага прадпрымальніка вызвалілі з-пад варты ў зале суда, прызначыўшы яму штраф.

Акрамя Мінаблсуда справы пра масавыя хабары ашмянскіх мытнікаў разглядалі суды Партызанскага, Фрунзенскага, Кастрычніцкага і Заводскага раёнаў сталіцы.

Па версіі суда, за хабар мытнікі бесперашкодна прапускалі буйныя партыі тавараў праз дзяржаўную мяжу Беларусі ў пункце пропуску "Каменны Лог".