Мабільнага аператара A1 аштрафавалі на больш як 100 млн рублёў

Эканамічны суд Мінска аштрафаваў кампанію А1 на 109,7 млн рублёў. Яшчэ 2250 рублёў штрафу павінна выплаціць службовая асоба кампаніі.

Мабільнага аператара абвінавацілі ў парушэнні антыманапольнага заканадаўства, паведамляе прэс-служба Міністэрства антыманапольнага рэгулявання. Раней кампанія закрыла два архіўныя тарыфныя планы ("Без ліміту" і "Без ліміту 2.0") і перавяла карыстальнікаў на новы, больш дарагі "Драйв анлім".

Гэтае рашэнне актыўна абмяркоўвалі ў сацсетках, на што і звярнулі ўвагу чыноўнікі МАРГ. У чэрвені 2026-га ў міністэрства адбылася сустрэча з прадстаўнікамі аператара. Па выніках сустрэчы кампанія вярнула абанентаў на ранейшыя безлімітныя тарыфныя планы.

Паведамляецца, што А1 не згодная з рашэннем суда і будзе аспрэчваць прысуд у больш высокай судовай інстанцыі.