Віцебскія ўлады адмовіліся прыбіраць шапікі "Табакеркі" з прыпынкаў
У афіцыйным адказе гарвыканкама пратэст віцяблян супраць "Табакерак" называецца беспадстаўным.
Віцебскі гарвыканкам адказаў на петыцыю гараджан супраць шапікаў "Табакеркі" на прыпынках грамадскага трапнспарту, перадае Радыё "Свабода".
За два тыдні пад петыцыяй супраць шапікаў з тытунёвымі вырабамі на прыпынках падпісаліся 2035 чалавек.
У адказе, які падпісаў намеснік старшыні Віцебскага гарвыканкама Сяргей Саглаеў, гаворыцца, што няма ніякіх законных падстаў, каб забараніць устаноўку "Табакерак".
Аўтар петыцыі Яўген Крыскевіч апеляваў да нядаўняга Дэкрэту №2 "Аб дзяржаўным рэгуляванні вытворчасці, абароту і спажывання тытунёвай сыравіны і тытунёвых вырабаў" (ад 24 студзеня 2019 года). Згодна з дэкрэтам, цяпер паліць на прыпыначных пунктах забаронена. Ставіць цыгарэтныя шапікі на прыпынках, дзе забаронена паліць, — цалкам супярэчыць гэтаму пункту дэкрэта.
Дарэчы, у "Табакерках" прадаюць не толькі цыгарэты, а яшчэ шакаладкі, печыва ды іншыя ласункі, што прыцягвае да іх дзяцей і падлеткаў.
Гарвыканкам спаслаўся на тое, што абсталяванне прыпынкаў з шапікамі робіцца за кошт устаноўшчыка "Табакерак" — СЗАТ "Энерга-Оіл". А гэта дазваляе эканоміць бюджэтныя сродкі. Месцы "Табакерак" вызначаюцца гарадскімі ўладамі разам з інвестарам. Продаж тытунёвых вырабаў у шапіках не з'яўляецца іх рэкламаваннем.