Вакарчук: "Сонца свеціць толькі папсе!"

Год "мокрых" і безалкагольных фестываляў не стаў выключэннем і для фэсту "Рок за Баброў", які ў чацвёрты раз зладзіла піваварная кампанія "Сябар".  Дождж, які зацягнуў неба з самага ранку, сыграў сваю ролю: паглядзець першыя выступы фестывалю — гурты "Open Space" і "Zombie Zoo" — сабралася вельмі сціплая жменька гледачоў.

Нягледзячы на тое, што вядучыя фэсту, Аляксандр Памідораў і Дзядзя Ваня, ўвесь час узгадвалі спонсараў "Рок за Баброў", кампанію "Heineken", піва на фестывалі не прадавалася. На жаль, у адпаведнасці з заканадаўствам, беларускія фестывалі па-ранейшаму застаюцца безалкагольнымі.



Усе тыя, хто прыйшоў на фэст з півам, вырашылі застацца па-за прапускным пунктам і слухаць канцэрт у некалькіх метрах ад сцэны. Іншыя адправіліся на пошукі па наваколлі Сілічаў — за некалькі гадзін і без таго сціплыя запасы піва ў мясцовых крамах таксама зніклі.



"Esprit"

Добрым гукам фестываль не парадаваў. Ледзь не пасля кожнай песні музыкантам прыходзілася нанова наладжвацца: з агульнай карціны рэгулярна знікаў хоць адзін з інструментаў. Вакалістка "ДзеціДзяцей" Аня Хітрык нават пашкадавала, што гурт выйшаў спяваць "на біс": "Лепш бы мы адразу сышлі! Больш наладжваемся, чым праспяваем"  — абуралася спявачка.

 "ДзеціДзяцей"


Не хапала фэсту і сапраўднага року: многія з прысутных наракалі, што сёлета не давядзецца пабачыць "Нейра Дзюбель", "Ляпісаў" ці "N.R.М.". Сакавітым, дзікім рок-н-ролам скалыхнуў натоўп гурт "The Toobes". Музыканты паскардзіліся на пустую сцэну і "упрыгожылі" яе голымі манекенамі.

"The Toobes"




Разбавіць поп-рок сцэну сёлетняга фэсту сваёй шалёнай музыкай прыехаў магілёўскі гурт "Маўзер". Свой выступ музыканты вырашылі падтрымаць не толькі словам — тэксты гурта "Маўзер" поўняцца сацыяльнай тэматыкай — але і справай: падчас выступу Ян Маўзер штурхнуў нагой мікрафонную стойку. За што быў адразу папярэджаны арганізатарамі: сваю тэхніку прыносьце — тады і ламаць будзеце.

"Маузер"


Склалася ўражанне, што першым хэдлайнерам, які з'явіўся на сцэне, стаў гурт "Без Білета": колькасць людзей каля сцэны адразу павялічылася. Акрамя вядомых кампазіцый, гурт прадставіў некалькі песень з будучага альбому "Афрыка".

"Без Білета"


Самы моцны дождж прыйшоўся на выступ апошніх гуртоў фестывалю. Здавалася, ўжо пад "Без білета" да сцэны было не падысці, а пры першым з'яўленні Уладзіміра Пугача гледачоў на пляцоўцы стала ў разы тры болей.

"J:морс"
 Пад буйныя кроплі яшчэ па-летняму цёплага дажджу "J:морс" настроілі публіку на рамантычны лад.. На экранах з'явіліся тэксты песень, а Уладзімір Пугач спусціўся да гледачоў.





"Океану Ельзи" Сілічы "здаліся без бою".


"Океан Ельзи"

Дождж, які ўжо амаль спыніўся, бліжэй да сярэдзіны выступу "Океана Ельзи", зарадзіў з новай сілай. Падчас "Вище неба" дажджом і ветрам вырывала парасоны. "Сонца свеціць толькі папсе!" — сказаў са сцэны Святаслаў Вакарчук.





Апошнія навіны

Галоўнае

Выбар рэдакцыі