Ва Украіне забілі падпалкоўніка са спецпалка імя Кадырава
Ва Украіне забілі Заура Дзімаева, падпалкоўніка са спецпалка імя Ахмада Кадырава. Як паведамляе Telegram-канал Baza, здарылася гэта ўдзень 31 траўня падчас баёў за Камышаваху (населены пункт каля Папаснай у Луганскай вобласці).
Аўтамабіль, на якім ехалі байцы спецпалка, трапіў пад украінскі артабстрэл. Двое супрацоўнікаў чачэнскай паліцыі загінулі, яшчэ чацвёра параненыя. Дзімаеў быў намеснікам камандзіра 4-га батальёна спецпалка. Разам з ім загінуў кіроўца.
Агульныя страты чачэнскіх падраздзяленняў ва Украіне не агучваюцца. Рамзан Кадыраў паведамляе толькі пра "поспехі".
