У Беларусі растуць продажы новых аўто
Лідарам продажаў застаецца Geely
З прыходам новых брэндаў продажы аўто ў Беларусі пачалі расці. Так, у гэтым верасні было прададзена 2058 легкавых аўтамабіляў. Гэта ў пяць разоў больш, чым у верасні год таму. Пра гэта распавялі ў Беларускай аўтамабільнай асацыяцыі.
Але ў параўнанні са жніўнем рост не выглядае такім ужо вялікім. У верасні дылеры прадалі толькі на 39 аўтамабіляў больш, чым месяцам раней. Па выніках дзевяці месяцаў 2023 года беларускі аўтарынак вырас на 13,2% у параўнанні з аналагічным перыядам 2022-га. Лідарам застаецца Geely. У верасні на долю гэтай маркі прыйшлося каля 70% продажаў, або 1365 аўтамабіляў.
"Усё гэта кажа пра тое, што сітуацыя на аўтамабільным рынку стабілізуецца, і пасля некалькіх гадоў імклівага падзення продажы новых легкавых аўтамабіляў могуць пачаць паступова расці", – пракаментаваў вынікі верасня член праўлення БАА Аляксандр Стэльмах. Паводле яго слоў, росту аўтамабільнага рынку спрыяе з'яўленне новых аўтамабільных брэндаў.
