Урад Расіі: кампаніі ў Беларусі і Расіі будуць працаваць на роўных умовах
Мішусцін з Лукашэнкам / Reuters
Урад Расіі зацвердзіў ўзгоднены для падпісання варыянт адзіных правілаў канкурэнцыі ў Саюзнай дзяржаве. Адпаведнае распараджэнне падпісаў прэм'ер-міністр Расіі Міхаіл Мишусцін. Гэта значыць, што антыманапольныя ўмовы для працы беларускіх і расійскіх кампаній павінны стаць роўнымі.
— Галоўная мэта пагаднення — стварэнне арганізацыйных і прававых асноў абароны канкурэнцыі для забеспячэння свабоднага перамяшчэння тавараў, работ, паслуг і справядлівага ў адносінах да ўсіх удзельнікаў функцыянавання рынкаў дзяржаў-членаў Саюзнай дзяржавы. Дакумент загадвае органам улады дзвюх краін спыняць любыя праявы манапалізму і ўжываць антыманапольнае заканадаўства да кампаній з Саюзнай дзяржавы на роўных умовах, — паведамляе прэс-служба ўрада Расіі.
Гэта павінна прывесці да "гарманізацыі антыманапольнага заканадаўства Расіі і Беларусі" ў рамках 28 саюзных праграм. Іх Беларусь і Расія зацвердзілі 4 лістапада 2021 года.
— Пагадненне накіравана на фарміраванне адзіных прадказальных правілаў вядзення бізнесу на тэрыторыях дзвюх краін, на аснове якіх будзе забяспечвацца абарона правоў і інтарэсаў прадпрымальнікаў і спажыўцоў Расіі і Беларусі, — заявіў віцэ-прэм'ер Расіі Аляксей Авярчук.
Правілы павінны зацвердзіць і падпісаць два бакі. Беларускае Міністэрства антыманапольнага рэгулявання і гандлю з гэтай нагоды ў апошні час не паведамляла ніякіх навін.
