У знак пратэсту супраць вайны — шматдзетная маці вярнула Лукашэнку ордэн Маці

Украінка Алена Якавішына вярнула ў Адміністрацыю прэзідэнта Беларусі ордэн Маці, якім яе ўзнагародзілі ў 2019 годзе. Пра гэта паведамляюць праваахоўнікі.

У Алены сямёра дзяцей.  Разам з ордэнам яна адправіла Аляксандру Лукашэнку ліст, у якім напісала, што ўдзячная "беларускай зямлі і выдатнаму беларускаму народу за гасціннасць і падтрымку, за дабро і клопат, якія знаходзіла тут усе гэтыя гады".

Разам з тым ёй незразумелая пазіцыя кіраўніцтва Беларусі. У яе краіне вайна, а кіраўнік суседняй дзяржавы не толькі не асудзіў дзеянні агрэсара, але і аказвае яму падтрымку — і палітычную, і ваенную. Беларусь дае сваю тэрыторыю для размяшчэння і ўварвання на тэрыторыю Украіны расійскіх войскаў, адсюль ажыццяўляюцца пускі "смяротных ракет па маім народзе, мірных гарадах", напісала Якавішына ў звароце да Лукашэнкі.

Алена Якавішына — грамадзянка Украіны, але пастаянна жыве ў Беларусі. Яна родам з Мікалаева, скончыла Кіеўскі нацыянальны універсітэт тэхналогіі і дызайну. У 17 гадоў прыехала ў госці ў Мінск, дзе пазнаёмілася з будучым мужам Юрыем.  Юрый раней быў вайскоўцам — абслугоўваў авіяцыйную тэхніку ў Мачулішчах. З 2006 года працуе ў грамадзянскай авіяцыі.