У Венесуэле працягваюцца пратэсты супраць фальсіфікацыі вынікаў выбараў

У Венесуэле працягваюцца пратэсты супраць фальсіфікацыі вынікаў прэзідэнцкіх выбараў. Напярэдадні дзейнага прэзідэнта Нікаласа Мадуру цэнтрвыбаркам аб'явіў іх пераможцам. Ён ва ўладзе ўжо больш за дзесяцігоддзе, мае падтрымку сілавікоў.

Апазіцыя з такім вынікам выбараў не згодная. Паводле апытанняў, яе прадстаўнік Эдмунда Гансалес упэўнена перамагаў. Аднак цэнтрвыбаркам агучыў, што ў яго толькі 44% (а ў Мадуры больш за 51%). Апазіцыйная лідарка Марыя Карына Мачада, якую ўлады не дапусцілі да ўдзелу ў выбарах, заявіла, што самастойны пералік галасоў паказвае ўпэўненую перамогу Гансалеса. Апазіцыя мае копіі 73% пратаколаў з выбарчых участкаў.

Апазіцыйныя лідары не заклікалі да пратэстаў, але яны пачаліся стыхійна: і ў Каракасе, і ў рэгіёнах. Спачатку гэта былі мірныя акцыі. Але пасля адбыліся сутыкненні з паліцыяй і вайскоўцамі. Сілавікі разганяюць вулічныя акцыі вадамётамі, пластыкавымі кулямі і слёзацечным газам. Пратэстоўцы адказваюць каменнем і бутэлькамі з гаручай сумессю. Яны паляць партрэты Нікаласа Мадуры, зносяць помнікі былому прэзідэнту Уга Чавесу. Мадура адмаўляе абвінавачванні ў падтасоўцы вынікаў выбараў. Паводле яго слоў, пратэсты супраць яго "перавыбрання" — гэта "спроба перавароту", паведамляе "Бі-Бі-Сі".