У сераду "Даніэлу" зменяць снег і галалёдзіца
13 студзеня ў Беларусі чакаецца воблачнае з праясненнямі надвор'е. На большай частцы тэрыторыі пройдзе снег, у паўднёвых раёнах — мокры снег. Сіноптыкі абвясцілі на сераду аранжавы ўзровень небяспекі, перадае БЕЛТА са спасылкай на Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Па словах сіноптыкаў, у сераду чакаюцца слабая завея і галалёд. Па паўднёвым усходзе на дарогах захаваецца галалёдзіца. Вецер будзе паўночна-заходні з пераходам на паўднёва-заходні 4-9 метраў за секунду, уначы будуць парывы да 14 метраў за секунду.
Тэмпература паветра на працягу сутак будзе -1...-8 градусаў, уначы па поўначы чакаецца да 10 градусаў марозу. Удзень у паўднёва-заходніх раёнах прагназуецца ад нуля да +2. А ўжо з 14 студзеня чакаецца паступовае ўзмацненне маразоў.
